Shumica e bashkive të vendit tonë rezultojnë të jenë me borxhe, madje disa prej tyre janë në rrezik falimentimi. Arsimi i dobët, ose mungesa e arsimit për administratorët, e shoqëruar në disa raste me papërgjegjshmëri prej tyre, besohet se janë disa nga arsyet që i kanë çuar bashkitë e vendit në prag falimenti. Kështu, të emëruar si më të ‘besuarit dhe të devotshmit e politikës’ pavarësisht aftësive për administrim, rezultati i administrimit prej tyre është dramatik.
Të paktën ish-komunat dhe disa nga ato që funksionimin si bashki të vogla dhe që administrohen nga një zyrtar i emëruar dhe jo i zgjedhur, nga keqadministrimi, kanë çuar disa prej 61 bashkive në kolaps financiar.
Në këto kushte qeveria po përgatitet të marrë në administrim disa bashki të vendit, mes të cilave edhe Bashkinë e Kavajës e të Vorës, për shkak të vështirësive financiare.
Kryebashkiaku i Kavajës, Redian Krali, u tha medieve se borxhi arrin në total 820 milionë lekë. Pjesën më të madhe të borxhit e zënë faturat e OSHEE-së, por bashkia – pretendoi ai – nuk ka rrezik falimenti. – “Zërin më të madh të borxheve e zë OSHEE. Ndërmorëm një investim, u përgjysmua faturimi. Ne jemi klasifikuar bashki në vështirësi financiare. Borxhi është 820 milionë lekë në total. Shumë borxhe na kanë. Bashkia vazhdon punën. Është shumë lart, ju garantoj. Nuk jemi në rrezik falimentimi. Ka vetëm progres”, tha Krali.
Krali shtoi se Bashkia e Kavajës nuk ka nevojë për administrator nga qeverie, “nuk jemi në vështirësi serioze, jemi në vështirësi financiare”. Krali po ashtu tha se bashkisë i ka mbërritur një grant për faturat e prapambetura dhe janë likujduar faturat më të vjetra. Situatë e vështirë paraqitet edhe në bashkinë Vorë dhe disa bashki të tjera.
Ministria e Financave nisur nga kjo situatë, duke qenë se jemi në një periudhë krize energjetike që mund të ndërlikohet në muajt e dimrit, ka shpallur një konkurs me disa kritere, për personat që do të marrin në administrim njësitë e pushtetit vendor. Ministrja e Financave, Delina Ibrahimaj, në një takim që zhvilloi më herët me kryetarët e bashkive bëri me dije se, në vështirësi financiare serioze paraqiten Bashkia e Vorës dhe ajo e Kavajës.
Ibrahimaj ju la afat bashkive me probleme financiare deri më datë 15 korrik për të dorëzuar në ministri një plan të detajuar për përmirësimin e financave. Edhe si herë të tjera, duket se bashkitë nuk e morën seriozisht këtë paralajmërim. Një javë më vonë me 22 korrik Ministria e Financave shpalli konkursin për administratorët që do marrin në dorë qeverisje reale të bashkive në faliment.
Sipas kritereve që ka vënë Ministria e Financave, aplikanti për administrator duhet të jetë i arsimuar në shkencat ekonomike ose juridike me master shkencor, të ketë së paku 10 vite eksperiencë në administratën publike, të ketë njohuri të thelluara në fushën e menaxhimit të financave publike në nivel vendor dhe gjithashtu nuk duhet të ketë konflikt interesi me njësitë e qeverisjes vendore. Personat e interesuar mund të aplikojnë deri në fund të muajit gusht, citon Monitor.
Pak ditë më parë në një takim me kryetarët e Bashkive Kryeministri Rama i paralajmëroi, se do nisë një fazë shtrëngimi, ku nuk do të ketë më tolerancë për bashkitë që thellojnë më tej borxhin. Ai paralajmëroi se bashkitë që nuk kanë disiplinë financiare do të merren nën administrim nga qeveria.
Kujtojmë se qytetarëve u ndërpriten dritat, në rast se nuk i paguajnë faturat në kohë ndërsa vetë pushteti lokal rezulton të jetë një ndër debitorët më të mëdhenj në OSHEE. Ka denoncime se kondicionerët lihen ndonjëherë ndezur edhe natën, në zyrat e administratorëve dhe drejtorëve, për të kuptuar përgjegjësinë dhe papërgjegjshmërinë mbi situatën e krijuar. /Liberale.al/
