Presidenti i Turqisë, Recep Tayyip Erdogan po zhvillon një vizitë njëditore në Lviv ku është takuar me presidentin ukrainas Zelenskyy në Pallatin Potocki. Liderët do të diskutojnë të gjitha aspektet e marrëdhënieve Turqi-Ukrainë në nivelin e partneritetit strategjik.
Bisedimet dypalëshe midis Erdogan dhe Zelenskyy do të pasohen nga një samit trepalësh me Sekretarin e Përgjithshëm të OKB-së Antonio Guterres.
Sipas presidencës turke, Erdogan, Zelensky dhe Guterres do të diskutojnë hapat që mund të ndërmerren për t’i dhënë fund luftës Ukrainë-Rusi përmes mjeteve diplomatike dhe për të ruajtur mekanizmin e krijuar për eksportin e grurit ukrainas në tregjet botërore.
Ata pritet të mbajnë një konferencë të përbashkët për shtyp pas takimit trepalësh.
Më 22 korrik, Turqia, OKB, Rusia dhe Ukraina nënshkruan një marrëveshje në Stamboll për të rihapur tre porte ukrainase të Detit të Zi për eksportimin e grurit ukrainas të bllokuar për shkak të luftës Rusi-Ukrainë, e cila tani është në muajin e saj të gjashtë.
Për të mbikëqyrur procesin, Qendra e Përbashkët Koordinuese (JCC) në Stamboll u lançua zyrtarisht më 27 korrik, e përbërë nga përfaqësues nga të tre vendet dhe OKB-ja, për të mundësuar transportin e sigurt të mallrave ushqimore dhe plehrave tregtare nga anijet tregtare.
Sipas OKB-së, Guterres ka planifikuar gjithashtu të vizitojë qytetin port ukrainas të Odesës për të parë lëvizjen e grurit pas takimit trepalësh. Guterres do të shkojë në Turqi të shtunën dhe do të vizitojë JCC në Stamboll./Liberale.al
