Çelja e negociatave, pas një rrugëtimi të gjatë e jo me pak pengesa e kushte nga vendet anëtare të Bashkimit Europian, hap për Shqipërinë rrugën e një angazhimi më konkret jo vetëm të institucioneve shtetërore, por edhe një diskutim më të gjerë të të gjithë aktorëve të shoqërisë.
Ky lajm bëri që Universiteti Europian i Tiranës t’ia kushtojë konferencën shkencore ndërkombëtare “Ditët e Studimeve Shqiptare” që do të mbahet më 28-29 prill 2023, pikërisht kësaj teme. Sipas zv/rektores për Kërkimin Shkencor në UET, Drita Kruja, ky hap në procesin e anëtarësimit kërkon mes të tjerash edhe përfshirjen e akademisë, përpos komunitetit të biznesit dhe shoqërisë civile.
Sipas zv/rektores, konferenca synon të reflektojë, debatojë dhe t’u përgjigjet pyetjeve sesa afër apo larg anëtarësimit me të drejta të plota në BE ndodhet Shqipëria apo të analizojë përvojat e fqinjëve ballkanas e të shohë modelet e suksesit mes anëtarëve të rinj në BE.
Në këtë edicion të dhjetë, priten të marrin pjesë kërkues shkencorë vendas e të huaj, që do të paraqesin e diskutojnë mes tyre punimet, që më vonë siç zbulon zonja Kruja, do të botohen në të pesë revistat shkencore të UET, për secilin fakultet përkatës.
Nisur nga kompleksiteti i procesit, organizatorët e konferencës inkurajojnë në pjesëmarrje studiues nga fusha të ndryshme, si politika, ekonomia, financa, IT, inxhinieria, drejtësia, sociologjia, antropologjia, psikologjia, arsimi, artet, mjekësia, etj.
Ditët e Studimeve Shqiptare, që prej themelimit më 2014-n, është përpjekur të adresojë përmes optikës së akademisë dhe kërkimit shkencor tematika të lidhura ngushtë me zhvillimin e shoqërisë. Vitin e kaluar, konferenca iu dedikua luftës në Ukrainë, ku u diskutuan mundësitë për rimodelimin e ekonomisë dhe shoqërisë, përmes asaj që u cilësua si “Shkatërrimi Krijues”. Po ashtu një edicion më herët iu kushtua pandemisë Covid-19, sfidat dhe mundësitë e normales së re. “Ditët e Studimeve Shqiptare është një festival idesh, një panair i paraqitjeve shkencore, një panair i debatit, një vend kontakti i të gjithë studiuesve shqiptarë dhe të huaj”, thotë zv/rektorja Kruja.
Ditët e Studimeve Shqiptare mbërrijnë në edicionin e dhjetë. Si ka qenë ky rrugëtim dhe cilat janë risitë e menduara për këtë vit?
Ditët e studimeve shqiptare është një logo që UET e krijoi në vitin 2014 si një konferencë shkencore e përvitshme, drejtuar jo vetëm akademikëve shqiptarë, por dhe studiuesve dhe akademikëve shqiptarë që studiojnë dhe punojnë në universitete e qendra kërkimore në shumë vende të botës, veçanërisht në universitete e institute shkencore perëndimore në BE, vende të OECD, etj.
Ditët e Studimeve Shqiptare është një festival idesh, një panair i paraqitjeve shkencore, një panair i debatit, një vend kontakti i të gjithë studiuesve shqiptarë dhe të huaj.
Ky aktivitet është gjithashtu një zë i fuqishëm në shoqërinë shqiptare, pasi kërkimi fokusohet drejt impaktit mbi shoqërinë dhe ekonominë nëpërmjet transferimit të dijes përtej komunitetit akademik, tek institucionet publike e private dhe grupet e interesit.
Rrugëtimi i DSSH-së ka qenë sa sfidues aq dhe i suksesshëm nisur si nga pjesëmarrja e më shumë se 1000 studiuesve të huaj dhe shqiptar ashtu dhe nga temat e trajtuara, të lidhura me çështje të zhvillimit ekonomik, politik dhe social dhe integrimit të Shqipërisë…
Në Maj 2014 ishte edicioni parë i konferencës me temë “Të rimendojmë zhvillimin dhe integrimin”, duke vijuar me “Transformimi i madh: 25 vjet përvoja shqiptare e tranzicionit dhe demokratizimit” (2015); “Shqipëria si objekt studimi: ekonomia, politika, zhvillimi social, e ardhmja” (2016); “Riinxhinierimi i reformave për një model të ri të rritjes ekonomike dhe zhvillimit shoqëror”(2017); “Shteti dhe të mirat publike/shërbimet: rregullator apo ofrues”(2018);“Shoqëria e dijes: gjetjet dhe zgjidhjet”(2019);“Rrugëtimi Shqiptar për demokraci e Zhvillim 1990-2020”(2020); “Normaliteti i ri”- sfida dhe mundësi (2021);“Krizat dhe shkatërrimi krijues -mundësitë për rimodelimin e ekonomisë dhe shoqërisë”(2022); “Hapi i fundit: Përgatitja e vendit për anëtarësim të plotë në Bashkimin Europian”(2023)
Punimet më të mira të konferencës do të botohen në çështje speciale të 5 Revistave shkencore të UET: Polis, Economicus, Medicus, Jus&Justicia dhe Ingenious, të cilat janë instrumenti kryesor nëpërmjet të cilit UET ‘komunikon’ me botën akademike dhe më gjerë. Po kështu një pjesë e tyre do të botohen në formën e “policy paper” dhe do t’u ofrohen institucioneve publike dhe jo publike si dokumente bazë për një politikëbërje më të mirë e eficiente në shërbim të qytetarit dhe zhvillimit ekonomik e social të vendit.
Ndërsa vitin e kaluar fokusi ishte tek pasojat e luftës në Ukrainë, por parë si një mundësi për të rimodeluar ekonominë dhe shoqërinë përmes asaj që u quajt si “Shkatërrimi Krijues”, këtë vit fokusi i konferencës do të jetë mbi përgatitjen e vendit për anëtarësim të plotë në BE. A është kjo konferencë si një ngjarje, e cila përpiqet të adresojë përmes akademikëve e studiuesve problematikat apo çështjet aktuale të lidhura me shoqërinë, jo vetëm në kontekst vendas, por edhe më të gjerë?
Kryefjala e konferencës së këtij viti është debati mbi “Hapi i fundit: Përgatitja e vendit për anëtarësim të plotë në Bashkimin Europian”.
Tetë vite pas statusit të vendit kandidat për Shqipërinë filloi një rrugëtim i ri hapja e negociatave që kërkon angazhimin maksimal të të gjithë institucioneve shtetërore në vend, përfshirjen e shoqërisë civile dhe komunitetit të biznesit, akademisë si dhe informimin e vazhdueshëm të qytetarëve.
Konferenca synon të reflektojë, debatojë dhe përgjigjet pyetjeve: Sa afër apo larg anëtarësimit me të drejta të plota në BE ndodhet Shqipëria? Cilat janë përvojat e fqinjëve ballkanas ? Cilat janë modelet e suksesit ?, etj.
Konferenca do të ketë 5 panele ndërdisiplinare të lidhura me Projektet e Mëdha Kërkimore (PMK), që përbëjnë shtyllën e kërkimit shkencor në UET: I. Integrimi Europian: sfidat ekonomike për Shqipërinë; II. Drejtësia, politika dhe marrëdhëniet ndërkombëtare në dritën e negociateve të BE-së; III. Identitetet shqiptare dhe evropiane: perspektiva të reja në humanitete, arsim, art dhe kulturë; IV. Teknologjia dhe inovacioni në ekonomi; V. Sfidat në praktikën klinike sipas standardeve të BE-së.
Vitin e kaluar u paraqitën rreth 60 punime shkencore dhe konferenca ndërkombëtare “Ditët e Studimeve Shqiptare” mblodhi kërkues vendas dhe të huaj. Po këtë vit, prisni të ketë më shumë vendas apo është edhe një mundësi për një vështrim edhe nga kërkuesit e huaj për çështjen e anëtarësimit, ndërsa thuajse i gjithë rajoni i Ballkanit është i përfshirë në këtë proces me Bashkimin Europian?
Besoj se DSSH 2023 do ngjallë interesin maksimal në rrjetet dhe komunitetin e kërkuesve shqiptarë, ballkanas dhe europianë.
A pritet të jetë një konferencë e cila do të mbledhë kërkues të sferave të ndryshme, duke qenë se procesi i anëtarësimit përfshin çdo hallkë të shoqërisë, jo vetëm atë politike? Nga cilat fusha prisni të vijnë punimet shkencore në këtë edicion të DSSH-së?
Duke pasur parasysh kompleksitetin e procesit dhe nevojën për të përfshirë të gjithë aktorët e shoqërisë në konferencë inkurajohen të marrin pjesë studiues nga fusha të ndryshme, si politika, ekonomia, financa, IT, inxhinieria, drejtësia, sociologjia, antropologjia, psikologjia, arsimi, artet, mjekësia, etj.
Cila është rëndësia e një konference të tillë ndërkombëtare për Universitetin Europian të Tiranës, por edhe për sferën akademike të vendit? Sa nxit një konferencë e tillë, tashmë traditë, kërkuesit e rinj?
Vizioni i kërkimit shkencor të UET në dekadën e tij të dytë është të konsolidojë identitetin e universitetit si qendër e prodhimit të dijes në Shqipëri e të transformohet nga një institucion i arsimit të lartë i fokusuar në mësimdhënie në një institucion elitar kërkimor, produkti kërkimor i të cilit kërkohet nga tregu dhe përmirëson në vazhdimësi mësimdhënien dhe eksperiencën studentore në UET.
Në kuadër të përmbushjes së këtij vizioni është dhe kjo konferencë, e cila do të sjellë së bashku emra të njohur kërkuesish shkencorë shqiptarë dhe të huaj, kërkues të rinj dhe doktorantë. Nëpërmjet prezantimeve, diskutimeve, debatit të ideve, reflektimeve, ndarjes së eksperiencave do të kontribuojnë në ofrimin e metodave bashkëkohore dhe inovative të kërkimit dhe dhënien e konkluzioneve dhe rekomandimeve të vlefshme për politikëbërësit.
Cili është filtri përmes të cilit kalojnë punimet e pjesëmarrësve në këtë konferencë?
Tashmë DSSH është konsoliduar si konferenca më prestigjioze në Shqipëri dhe është pranuar si e tillë edhe nga komuniteti shkencor ndërkombëtar pasi aplikon standardet e mëposhtme: Prezantimet janë në gjuhën angleze; Nuk pranohen prezantimet me poster; Artikujt kalojnë në procesin peer review, Artikujt mbi të cilët bazohen prezantimet dorëzohen 1 javë përpara konferencës dhe vendosen në faqen e DSSH që të jenë të lexueshme nga pjesëmarrësit e konferencës. Për çdo prezantim ka një diskutues (discussant) nga paneli përkatës, i cili bën një analizë analitike të punimit që shërben si bazë e diskutimeve të mëtejme./Liberale.al
