Daily Mail ka pasqyruar zhvillimet e djeshme në Tiranë, ku nga njëra ana zhvillohej Samiti i vendeve të BE-së për Ballkanin Perëndimor, dhe nga ana tjetër protesta e opozitës, e cila kulmoi me incidentin kur u godit me grusht në fytyrë ish-kryeministri Sali Berisha.
Momentin e goditjes së Berishës, media britanike e ka pasqyruar më gjerësisht, duke e ilustruar me video dhe fotot përkatëse.
Pasqyrimi i plotë i Daily Mail, mbi zhvillimet e djeshme politike në Tiranë:
Ish-presidenti shqiptar, 78 vjeç, goditet me grusht në fytyrë dhe u shfaq para publikut me syrin të zi, teksa një bandit e sulmoi atë gjatë një proteste antiqeveritare
Sali Berisha, 78 vjeç, u godit me grusht në fytyrë nga një 31-vjeçar, në kryeqytetin shqiptar. Berisha po drejtonte qindra protestues drejt vendit të takimit të liderëve të BE-së dhe homologëve të tyre të Ballkanit Perëndimor në Tiranë kur u sulmua.
Video tregon Berishën, i cili drejton Partinë Demokratike të qendrës së djathtë , teksa po marshonte duke u zmbrapsur nga grushti i fuqishëm dhe i papritur, ndërsa truprojat e tij nxituan për të neutralizuar agresorin.
Berisha, një ish-president dhe kryeministër i Shqipërisë, u pa më vonë duke lyer butësisht syrin e tij të zi me një shami. Policia tha se një i dyshuar 31-vjeçar, i cili u prangos më vonë, kishte vuajtur nga ‘parregullsi psikiatrike’ dhe ishte përballur më parë me akuza për akte dhune dhe trafik droge.
Mijëra mbështetës të opozitës u mblodhën të martën në Tiranë, ndërsa Shqipëria priste samitin e parë BE-Ballkan, ku merrnin pjesë krerët e vendeve anëtare të Bashkimit Evropian, për të protestuar kundër qeverisë së kryeministrit Edi Rama dhe për të kërkuar zgjedhje të parakohshme. Opozita po proteston kundër korrupsionit të dyshuar të Ramës, të cilin e fajëson edhe për krizën e kostos së jetesës në vend dhe eksodin e të rinjve shqiptarë që largohen për një jetë më të mirë në vendet e Evropës Perëndimore. Zoti Berisha akuzoi drejtpërdrejt zotin Rama për sulmin, duke thënë se ai donte të ndalonte opozitën nga organizimi i protestës.
Zoti Berisha tha se sulmi ishte një “vepër kriminale kundër tij i nxitur nga policia e shtetit”. Kryeministri socialist i Shqipërisë Edi Rama e dënoi ‘pa mëdyshje’ incidentin. “Dhuna nuk ka qenë, nuk është dhe nuk do të jetë kurrë mjet për të zgjidhur një problem apo shqetësim dhe kushdo që e përdor duhet të përballet me forcën e ligjit”, tha Rama në një deklaratë. Shqipëria ka parë një rritje prej më shumë se 8 për qind të çmimeve këtë vit, veçanërisht për ushqimet bazë dhe karburantet pas pushtimit rus të Ukrainës.
Zoti Rama thotë se kabineti i tij e ka mbajtur inflacionin të ulët krahasuar me inflacionin dyshifror që ka shpërthyer kudo në Evropë dhe ka vënë në dukje se qeveria po subvencionon energjinë elektrike për familjet dhe bizneset e vogla. Partia e zotit Berisha është goditur nga grindjet e brendshme pasi sekretari amerikan i shtetit Antony Blinken vitin e kaluar ndaloi zotin Berisha dhe rrethin e tij familjar të futeshin në SHBA, duke e akuzuar për ‘akte korruptive që minuan demokracinë’ gjatë mandatit të tij si kryeministër 2005-2013. Britania e Madhe bëri të njëjtën gjë këtë vit. Nga ana tjetër, Berisha i mohon akuzat.
Udhëheqësit e BE-së dhe homologët e tyre të Ballkanit Perëndimor ndodheshin në Tiranë për bisedime, që synojnë forcimin e partneritetit të tyre, pasi lufta e Rusisë në Ukrainë kërcënon të riformësojë ekuilibrin gjeopolitik në rajon. /Liberale.al/
