Pas rënies së një zjarri shkatërrues në prill 2019, Katedralja Notre-Dame në Paris ka vendosur të rihapë dyert e saj për publikun më 7 dhjetor, duke shënuar një rast të rëndësishëm për Francën dhe botën, shkruan France 24. 

Presidenti Emmanuel Macron, ka shkuar në Katedralen “Notre-Dame” të premten me një ekip televiziv për t’i treguar botës katedralen e restauruar, pesë vjet e gjysmë pasi ndërtesa u shkatërrua pjesërisht nga zjarri.

Macron është i shoqëruar nga kryearkitekti Philippe Villeneuve, i cili ka treguar për procesin e restaurimit të kësaj vepre gjigande.

Villeneuve ka përmendur sfidat me të cilat janë përballur punëtorët, si moti e pandemia me COVID-19. Presidentit iu tregua statuja e Virgjëreshës me fëmijë e shekullit të 14-të, një nga simbolet e Notre-Dame, e cila u shpëtua nga zjarri.

Rihapja do të fillojë të shtunën e ardhshme me një fjalim të presidentit Macron, e ndjekur nga një ceremoni në dyert e katedrales nga Kryepeshkopi Laurent Ulrich.

Brenda do të këndohen psalme të lashta dhe organi historik i katedrales do të rezonojë edhe një herë pasi të bekohet.

Ndërsa mesha do të fillojë më 8 dhjetor, duke filluar një seri tetë-ditore shërbimesh falënderimi kushtuar donatorëve, zjarrfikësve dhe artizanëve që kontribuan në restaurimin./ Liberale.al