Globi

HISTORIKE/ Parlamenti Europian miraton rregulloren e re për Inteligjencën Artificiale

Shkruar nga Liberale

HISTORIKE/ Parlamenti Europian miraton rregulloren e re për

Parlamenti Europian miratoi sot me shumicë votash rregulloren për inteligjencën artificiale, duke tejkaluar dhe SHBA-të në rregullimin e një teknologjie që ka marrë shumë kritika. 

Qëllimi i rregullores është të garantojë sigurinë e përdoruesit dhe respektimin e të drejtave themelore duke nxitur inovacionin.

Legjislacioni i ri kërkon të mbrojë të drejtat themelore, demokracinë, sundimin e ligjit dhe qëndrueshmërinë mjedisore nga sistemet e AI me rrezik të lartë, duke nxitur inovacionin dhe duke vendosur Europën si një forcë udhëheqëse në këtë fushë.

CNN shkruan se për këtë qëllim, rregullorja përcakton detyrime të ndryshme për sistemet e inteligjencës artificiale, në varësi të rreziqeve dhe ndikimeve të mundshme të përdorimit të tyre.

Përdorimi i sistemeve biometrike të identifikimit nga forcat e rendit është përgjithësisht i ndaluar, përveç rasteve specifike të renditura dhe të detajuara në rregulloren e re

Përdorimi i sistemeve të identifikimit biometrik “në kohë reale” lejohet vetëm në kushte strikte: nëse, për shembull, identifikimi biometrik do të përdoret vetëm për një kohë të kufizuar dhe në një zonë të kufizuar gjeografike, me leje të posaçme paraprake nga autoritetet gjyqësore ose administrative.

Raste të tilla mund të jenë kërkimi i synuar për një person të zhdukur ose parandalimi i një sulmi terrorist.
Rregullorja e re përcakton gjithashtu detyrime të qarta për sistemet e tjera të inteligjencës artificiale që konsiderohen me rrezik të lartë për shkak të efekteve të dëmshme të rëndësishme që mund të kenë në shëndetin, sigurinë, të drejtat themelore, mjedisin, demokracinë dhe sundimin e ligjit.

Teksti liston fushat në të cilat përdoren ose mund të përdoren sisteme të tilla, të cilat janë: infrastruktura kritike, arsimi dhe trajnimi profesional, punësimi, shërbimet thelbësore private dhe publike (p.sh. kujdesi shëndetësor, bankat), zbatimi i ligjit, imigracioni dhe menaxhimi i kufirit, si dhe proceset gjyqësore dhe demokratike (p.sh. për të ndikuar në proceset zgjedhore).

Këto sisteme duhet të vlerësojnë dhe minimizojnë rreziqet, të jenë transparente dhe të sakta dhe të mbikëqyren nga njerëzit.

Qytetarët do të kenë të drejtë të paraqesin ankesa për sistemet e inteligjencës artificiale dhe të marrin shpjegime për çdo vendim të bazuar në sisteme me rrezikshmëri të lartë që prek të drejtat e tyre./ Përshtati A.Mënalla/ LIberale.al

Liberale Newsroom

Poll
SHQIPENGLISH