Binjakët katër-ditorë janë vrarë në një sulm ajror izraelit në Gaza, ndërsa babai i tyre shkoi për të regjistruar lindjet, tha ai, ndërsa Izraeli vazhdonte bombardimet e tij ndaj territorit.
Mohamed Abuel-Qomasan tha se gruaja e tij, Joumana Arafa, një farmaciste, kishte lindur me prerje cezariane katër ditë më parë dhe njoftoi ardhjen e binjakëve në Facebook, raporton Associated Press.
Të martën ai kishte shkuar për të regjistruar lindjet në zyrat e regjistrimeve të pushtetit vendor. Ndërsa ndodhej atje, fqinjët e thirrën për ti thënë se shtëpia ku ai po strehohej, afër qytetit qendror të Deir al-Balah, ishte bombarduar.
"Unë nuk e di se çfarë ndodhi," tha ai për AP ndërsa ishte ulur në spitalin ku u morën trupat e tyre, duke mbajtur certifikatat e lindjes së binjakëve. “Më kanë thënë se ishte një predhë që goditi shtëpinë.”
Sulmi që vrau të sapolindurit – një djalë, Asser, dhe një vajzë, Ayssel – vrau gjithashtu nënën e tyre, Arafa, si dhe gjyshen e binjakëve. Abuel-Qomasan dhe gruaja e tij kishin dëgjuar urdhrat për të evakuuar qytetin e Gazës në javët e para të luftës. Ata kërkuan strehim në Gaza qendrore, siç kishte udhëzuar ushtria.
Ushtria izraelite nuk iu përgjigj menjëherë një kërkese për koment mbi sulmet, raportoi AP.
Diku tjetër, një foshnjë tre muajshe ishte e vetmja anëtare e familjes së saj të afërt që i mbijetoi një sulmi ajror izraelit pranë qytetit jugor të Khan Younis, në të cilin 10 njerëz u vranë duke përfshirë pesë vëllezërit e motrat e saj, të moshës pesë deri në 12 vjeç.
Sulmi vonë të hënën vrau gjithashtu prindërit e Reem Abu Hayyah dhe prindërit e tre fëmijëve të tjerë. Reem dhe tre fëmijët e tjerë të mbijetuar u plagosën të gjithë nga sulmi.
"Nuk ka mbetur askush përveç kësaj foshnje," tha halla e Reem, Soad Abu Hayyah. “Që nga mëngjesi po mundohemi t’i ushqejmë formulën, por ajo nuk e pranon, sepse është mësuar me qumështin e nënës”. Janë pasojat e një lufte që nuk po kurse as fëmijët.
Liberale.al
