Një grup aktivistësh, përfshirë edhe aktivisten suedeze Greta Thunberg, janë ndaluar nga autoritetet izraelite ndërsa përpiqeshin të hynin në Gaza me një jaht humanitar. Anija u kap dhe u tërhoq në portin izraelit të Ashdodit të hënën në mëngjes, ndërsa pasagjerët u dërguan në aeroportin Ben Gurion në Tel Aviv për deportim, njoftoi qeveria izraelite.
Izraeli e përshkroi anijen si një “jaht për selfie” dhe deklaroi se ata që refuzojnë të nënshkruajnë dokumentet për deportim do të përballen me masa ligjore. Sipas ministrisë së jashtme izraelite, aktivistët do të largohen nga vendi, ndërsa ata që kundërshtojnë këtë do të përballen me gjykatat.
Grupi aktivist Koalicioni i Flotiljes së Lirisë (FFC), i cili operonte jahtin, bëri me dije se aktivistët po transferoheshin në paraburgim nga autoritetet izraelite.
Në bord të anijes ndodheshin qytetarë nga vende të ndryshme si Brazili, Franca, Gjermania, Holanda, Spanja, Suedia dhe Turqia, duke përfshirë edhe deputeten franceze Rima Hassan dhe gazetarin francez të Al Jazeera-s, Omar Faiad.
Anija kishte nisur udhëtimin nga Italia më 1 qershor me qëllim ngritjen e vetëdijes për krizën humanitare dhe kushtet e vështira të urisë në Gaza, si dhe për të shpërndarë ndihma.
Izraeli argumenton se bllokada ndaj Gazës është e nevojshme për të parandaluar hyrjen e armëve në duart e Hamasit, organizatës që kontrollon rajonin.
