Irani dhe Izraeli kanë nisur sulmet ndaj njëri-tjetrit në orët e para të mëngjesit të sotëm. Shqiptarja Jeta Gani, e cila jeton dhe punon si mësuese në Izrael, ka treguar për “Shqipëria Live” gjendjen në të cilën ndodhet vendi.
Ajo e cilësoi si tmerrues mëngjesin e sotëm, pasi ishte një situatë që nuk pritej. Sipas Ganit, ky është një moment historik pasi Izraeli kishte kohë që kërkonte të luftonte me Iranin por nuk i ishte dhënë mundësia më herët.
“Flitet për një moment historik për Izraelin. Izraeli ka afërsisht 20 vite që do të luftojë me Iranin. Nuk i ishte dhënë më herët kjo mundësi dhe tani erdhi koha. Është një shtet mysliman dhe të gjithë shtetet e tjera që jetojnë së bashku, ndërsa Izraeli është ndryshe. Ne nuk e dinim, u zgjuam sot në mëngjes mes bombardimeve. U futëm në një strehë të frikësuar. Jemi të tmerruar. E dimë që Irani nuk është si Hamasi, është komplet diçka tjetër. U mbyllën të gjitha institucionet. U bë organizim që nuk është më parë. Lufta e Izraelit bëhet së pari për të mbrojtur popullin e vet.
Në mesazhin që na erdhi thuhej: ‘Ne kemi sulmuar Iranin. Qëndroni në gatishmëri. Qëndroni në shtëpi, evitoni daljet dhe prisni për informacione të mëtejshme’.
Ne jemi gjithë kohën të informuar, ka kohë që i marrim këto mesazhe por sot situata ishte ndryshe, ishte më e rëndë. I gjithë Izraeli po sulmohet, jo vetëm Tel Aviv.”-u shpreh ajo.
