Social Demokratët e kancelarit Scholz dhe deputetët e opozitës kanë arritur një marrëveshje për mbajtjen e zgjedhjeve të parakohshme federale më 23 shkurt, sipas njoftimeve nga zyrtarët qeveritarë.

Pas shkarkimit të ministrit të Financave më 6 nëntor, koalicioni qeverisës i Gjermanisë ra, duke hapur rrugën për zgjedhje të parakohshme. Ky zhvillim ka shkaktuar kaos politik në ekonominë më të madhe të Europës, disa orë pas fitores së Donald Trump në zgjedhjet presidenciale në SHBA.

Në sondazhe, Friedrich Merz, lideri i aleancës konservatore CDU/CSU, është përmendur si kryesues i mundshëm në zgjedhje, por kancelari Scholz ka shprehur besimin se mund të arrijë të fitojë dhe pritet që partia e tij ta mbështesë për një mandat tjetër.

Për të kandiduar përsëri, Scholz duhet të sigurojë një votëbesim në dhomën e ulët të parlamentit, një votim që pritet të mbahet në gjysmën e parë të dhjetorit. Zgjedhjet duhet të zhvillohen brenda 60 ditëve nga ky moment.

Zyrtarët gjermanë kanë shprehur shqetësime se mbajtja e zgjedhjeve në fillim të janarit mund të sjellë probleme logjistike dhe të hapë mundësi për sfida ligjore.