Shtetet e Bashkuara u tronditën të shtunën pas një akti të rëndë dhune në Minnesota, ku dy persona u vranë dhe dy të tjerë u plagosën rëndë në dy sulme të ndara.
Autori i dyshuar është Vance Luther Boelter, 57 vjeç, ish-drejtor i një kompanie sigurie dhe me trajnim ushtarak. Ai ishte maskuar si polic kur kreu sulmet.
Fillimisht, Boelter sulmoi shtëpinë e senatorit John Hoffman, duke e plagosur atë dhe bashkëshorten e tij, Yvette. Më pas, shkoi në shtëpinë e ish-kryetares së Dhomës së Përfaqësuesve të Minnesota-s, Melissa Hortman, ku vrau atë dhe bashkëshortin e saj, Mark.
Ngjarja ka shkaktuar tronditje në të gjithë vendin. Presidenti Donald Trump e dënoi sulmin përmes një deklarate, duke e quajtur “të tmerrshëm dhe të papranueshëm”.
Trump tha se Prokurorja e Përgjithshme Pam Bondi dhe FBI-ja janë duke hetuar dhe se autori do të përballet me ndëshkimin më të ashpër që lejon ligji. “Zoti i bekoftë njerëzit e Minnesotës”, përfundoi ai.
Hetimet janë ende në vazhdim, ndërsa autoritetet po përpiqen të zbulojnë arsyet që çuan në këtë akt tragjik.
