Bajram Begaj mori fjalën në Kuvend, pas betimit si President i ri i vendit. Ai e konsideroi përgjegjësi marrjen e detyrës, ndërkohë që e konsideroi një moment historik hapjen e negociatave me Bashkimin Europian.
"E nderuar zonja kryetare e Kuvendit, i nderuar zoti kryeministër, të nderuar ministra, deputetë, ambasadorë, përfaqësues të komuniteteve fetare, të dashur qytetarë! Është nder për mua t’i drejtohem Kuvendit si president i republikës. Jam i vetëdijshëm se mbi privilegjin e Presidentit të Republikës, rëndon përgjegjësia e unitetit kombëtar. Shqipëria jonë e dashur ka hyrë në një rrugë të pakthyeshme europiane. Shqipëria europiane sot premtim dhe nesër realitet është kurora e ëndrrës më të bukur, është përmbushja e ëndrrës shekullore dhe bekimi i së ardhmes. Unë e njoh dhe mbështes opozitën shqiptare. Shqipëria dhe shqiptarët janë rreshtuar në anën e duhur", u shpreh Begaj.
Kujtojmë se, Bajram Begaj u zgjodh president i ri i Shqipërisë më 4 qershor me 78 vota. Ai do të pasojë në detyrë presidentin Ilir Meta.