Ish-kryeministri Sali Berisha ka zhvilluar ditën e sotme një takimin e tij elektoral me demokratët e Fierit në kuadër të fushatës për zgjedhjen e kreut të PD.
Gjatë fjalës së tij, Berisha nuk i kurseu sulmet për kryeministrin Edi Rama për deklaratat e tij në Bruksel, i cili paralajmëroi rishikimin e pozicionit të Shqipërisë nëse deri në qershor nuk ka një datë për negociatat me BE.
“Nja arritëm, tani jemi opozitë e vërtetë. Kjo ka filluar të ndjehet. Por një PD opozitë e vërtetë është dhe duhet të jetë mjet për të shpëtuar Shqipërinë nga kjo situatë ndër më të vështirat. Në pamje të parë duket sikur gjërat lëvizin por në thelb lëvizin në mënyrën më të gabuar dhe në kundërshtim me interesat tona. Interesi kombëtar është interesi i të gjithë interesave. Nëse nuk qëndrojmë për ta mbrojtur atë interes shkojmë drejt shpërbërjes.
Ne si komb kemi qenë dhe vazhdojmë të jemi të rrethuar me albanofobi. Kjo albanofobi bëhet e efektshme kur ka një përputhje me qëndrimet tona. Mund tu jap 100 shembuj por po ndalem te dy të fundit. Tre ditë më parë kryeministri i Shqipërisë në Bruksel deklaron se nëse deri në qershor nuk na hapin negociatat do konsiderojmë çfarë drejtimi do marrë vendi. Ramiz Alia në vitet ’90 na thoshte nuk jemi Lindje as Perëndim. Enver Hoxha na çonte nga donte vetë. Në Perandorinë Osmane, perandori bënte gjithçka që mos të quheshim shqiptarë, komb nuk na njihnin. Gjuha shqipe ishte e vetmja gjuhë e dënuar për të mos u mësuar në shkolla osmane.
Bëhej një betejë kundër identitetit tonë. Tani na del Edi Rama. Ku do shkojmë ne mor zotëri që paske ndërmend të rishohësh drejtimin tonë, drejt Beogradit apo drejt Stambollit? Jo mor zotëri, ne yll polar kemi Bashkimin Evropian. Shikoni në çfarë kërcënimi është interesi jonë kombëtar.” – tha Berisha.
