Aktualitet

Bajram Begaj i drejtohet Parlamentit për t’u betuar si President

Shkruar nga Liberale
Bajram Begaj i drejtohet Parlamentit për t’u betuar si President

Bajram Begaj është nisur nga banesa e tij për t’iu drejtuar godinës së Kuvendit të Shqipërisë, ku do të bëjë edhe betimin si President i ri.

Ceremonia do të mbahet në orën 18:00, ku pritet të nisë ceremonia zyrtare e betimit. Seanca do nisë nga kryetarja e Kuvendit, Lindita Nikolla.

Kujtojmë se, Bajram Begaj u zgjodh president i ri i Shqipërisë më 4 qershor me 78 vota. Ai do të pasojë në detyrë presidentin Ilir Meta.

Kush është Bajram Begaj?

Bajram Begaj ka lindur më 20 Mars 1967, ai është një oficer ushtarak shqiptar, i cili po shërben si Shef i Shtabit të Përgjithshëm të Forcave të Armatosura Shqiptare. Në vitin 2020, Bajram Begaj mori rolin e Shefit të Shtabit të Përgjithshëm të Forcave të Armatosura Shqiptare. Gjeneralmajor Bajram Begaj, ka përfunduar “Doktoratën në Fushën e Mjekësisë”, pranë Fakultetit të Mjekësisë si dhe mban titullin “Profesor i Asociuar” në Mjekësi.

Ai më parë ka shërbyer si Komandant i Komandës së Trajnimit dhe Doktrinës, Shef i Njësisë Mjekësore Ushtarake, Drejtor i Inspektoratit Shëndetësor dhe Kryeinspektor dhe Këshilltar i Inspektoratit Shëndetësor në Shtabin e Përgjithshëm të Forcës së Armatosur Shqiptare.

Begaj ka ndjekur kualifikime dhe specializime të ndryshme në fushën ushtarake dhe atë mjekësore, në institucionet arsimore brenda dhe jashtë vendit. Ai ka përfunduar Kursin e Lartë për Sigurinë dhe Mbrojtjen pranë Akademisë së Forcave të Armatosura, Shkollën e Thelluar Pasuniversitare të Mjekësisë dhe specializimin pasuniversitar në profilin Gastrohepatologji, pranë Fakultetit të Mjekësisë Tiranë. Ka ndjekur kursin e menaxhimit spitalor dhe kursin e lidershipit mjekësor strategjik, në SHBA, Kursin e Lartë Ndërkombëtar të Menaxhimit të Mbrojtjes, pranë Institutit të Menaxhimit të Burimeve të Mbrojtjes në Shkollën Pasuniversitare të Marinës në SHBA, Seminarin e Lartë Ekzekutiv pranë Qendrës Marshall, Gjermani, si dhe kurse e kualifikime të tjera ushtarake.

 

Liberale Newsroom

Poll
SHQIPENGLISH