Policia e Northumbria, Britani e Madhe, njoftoi se ka shkatërruar një rrjet shqiptar të drogës. Pesë anëtarë të një rrjeti shqiptar të drogës janë burgosur pasi oficerët e policisë zbuluan “sipërmarrjen e tyre të paligjshme”.
Grupi, i udhëhequr nga vëllezërit Eglantin dhe Klerdi Alcani, u deklaruan fajtor për prodhimin dhe shitjen e sasive të mëdha të kanabisit, në verilindje të Anglisë.
Oficerët konfiskuan një sasi kanabis me vlerë mbi 60,000 paundë.
Në shkurt të vitit të kaluar nisën hetimet pasi oficerët vunë re një makinë me pamje të dyshimtë.
Kur ata iu afruan automjetit, gjetën Erdi Haldedën në sediljen e shoferit së bashku me bashkëpunëtorin e tij, Olti Gjoni dhe një çantë me 47,574 paundë.
Kontrollet rutinë zbuluan se Haldeda nuk kishte licencë ose sigurim dhe makina ishte e regjistruar në një adresë në Glasgow, nën emrin e një bashkëpunëtoreje tjetër, Kayana Dodgson.
Haldeda dhe Gjoni u arrestuan, ndërsa detektivët më pas nisën hetimet.
Një kontroll në adresën e Haldeda-s në Faraday Grove në Gateshead gjeti një numër bimësh kanabisi dhe nga një kontroll në një banesë, në Newburn gjetën edhe 12.5 kilogramë kanabis si dhe 15,000 paundë të tjera “cash”.
Vëllezërit Alcani u identifikuan shpejt si lojtarët kryesorë në zinxhirin e prodhimit të drogës së klasit B. Ata u arrestuan disa javë pas bastisjes.
Dodgson u arrestua më vonë dhe grupi doli para gjykatës së Newcastle Crown, ku të gjithë përveç Haldeda u deklaruan fajtorë për rolet e tyre në rrjetin e drogës.
Erdi Haldeda, 33 vjeç, u shpall fajtor për posedim të pasurisë që buronte nga aktivitete kriminale. Haldeda u burgos për dy vjet e gjashtë muaj, ndërsa Gjoni u burgos për 12 muaj.
Elegantin Alcani, 24 vjeç, u dënua me dy vjet burg për prodhim kanabisi, ndërsa vëllai i tij Klerdi, 25 vjeç, u burgos me gjashtë vjet e gjysmë për prodhim kanabisi dhe posedim të pasurive kriminale.
Dodgson u burgos për një total prej nëntë vjet e gjysmë.
Pas dënimit, kryeinspektorja Anegla Hudson tha: “Si forcë, ne e kemi bërë të qartë se absolutisht nuk do të tolerojmë prodhimin, furnizimin dhe shitjen e drogave të paligjshme 1ë shkaktojnë dëme në komunitetet tona. Ne do të bëjmë gjithçka që është në detyrën tonë, për të çmontuar grupet që janë të përfshirë në këto aktivitete”.
“Ne e kuptojmë, – theksoi ajo,- “se njerëzit kanë pikëpamje të ndryshme për kanabisin, por realiteti është se këto grupe kriminale do të përdorin përfitimet e tyre të paligjshme për të kryer më tej, vepra më serioze që kanë një ndikim të thellë në komunitetet tona”.
/Liberale.al/
