Aktualitet

Akuzat e Berishës për kompaninë e mjeteve lundruese, reagon ministri Çuçi: I hedh poshtë me neveri këto sajesa

Shkruar nga Liberale
Akuzat e Berishës për kompaninë e mjeteve lundruese, reagon

Ministri i Brendshëm, Bledi Çuçi ka reaguar lidhur me akuzat e ish-kryeministrit Sali Berisha për një kompani mjetesh lundruese në pronësi të tij.

Sipas ekstraktit të QKB, që iu referua Berisha, ministri Çuçi figuron pronar i subjektit ‘Albanian Sailing Club’.

“Ka një përpjekje për të prodhuar fakte që të ilustrojnë akuzat e gatshme të Sali Berishës ndaj meje pas tragjedisë së fundit në Himarë. Për respekt të opinionit publik, që me të drejtë është i ngarkuar nga tragjedia e vajzës 7-vjeçare dhe dhimbja e familjes së saj, dua të sqaroj se sajesat me emrin tim dhe një shoqatë velierash sportive që kam krijuar me miq pasionantë të tyre, nuk kanë lidhje me asnjë biznes dhe aq më tepër me skafe apo gomone. I hedh poshtë me neveri këto sajesa, pasi duan të keqpërdorin në mënyrë të neveritshme këtë ngjarje tragjike, për ta mbajtur gjallë për hallet e tyre politike”, shkruan Çuçi.

Ndërsa më tej në reagimin e tij, Çuçi shprehet se, “gjatë këtyre ditëve të rënda për çdo shqiptar, por veçanërisht për familjen e vajzës dhe për ne që jemi përgjegjës për sigurinë e jetës së tyre, jam përpjekur të flas me veprime konkrete kundër fajtorëve të asaj tragjedie, të cilët tani janë para drejtësisë, përfshirë gjithashtu dhe të gjithë zinxhirin komandues të Policisë Kufitare Vlorë”.

“Mendoj se kjo është rruga e duhur për të respektuar dhimbjen e familjes së vajzës dhe të afërmve të saj. Rruga për t’u përballur me baltën e Sali Berishës është 30- vjeçare dhe nuk më sfidon. Thjesht e kemi detyrim ndaj shqiptarëve të ndajmë fatin e Shqipërisë nga fati dhe balta e tij”, përfundon Çuçi.

Kujtojmë se, tre ditë më parë Jonada Avdia humbi jetën pasi u përplas nga një skaf, drejtues i të cilit ishte Shef i Policimit në Komunitet në Drejtorinë Vendore të Policisë Elbasan, Arjan Tase. /Liberale.al

Liberale Newsroom

Poll
SHQIPENGLISH