Pati një protestë të ngjashme në vendin tonë në fillim të vitit të ri akademik në arsimin e lartë, e cila, edhe pse e reduktuar në numra duket se dekurajoi mësuesit dhe sektorët e tjerë për të protestuar dhe kërkuar paga më të larta për kostot e papërballueshme të jetesës, si pasojë e rritjes së çmimeve.
Dhjetëra mijëra mësues të shkollave publike dhe stafet arsimore marshuan në Lisbonë të shtunën për të kërkuar paga më të larta dhe kushte më të mira pune, duke vënë nën presion të mëtejshëm qeverinë portugeze, ndërsa ajo përballet me krizën e kostos së jetesës.
Me slogane si “për bankat ka miliona, për neve ka vetëm qindarka”, rreth 80,000 protestues mbushën kryeqytetin portugez, tha policia.
Një vit pasi kryeministri socialist Antonio Costa fitoi shumicën në parlament, ai po përballet me një rënie të popullaritetit dhe protesta masive në rrugë, jo vetëm nga mësuesit, por edhe nga profesionistë të tjerë si mjekët.
Unioni i të Gjithë Profesionistëve të Arsimit kërkon që qeveria të rrisë pagat e mësuesve dhe punonjësve të shkollave me të paktën 120 euro në muaj dhe të përshpejtojë përparimin e tyre në karrierë. Qeveria nuk ka bërë ndonjë kundërpropozim posaçërisht për mësuesit por ka thënë se do të rrisë pagat mujore të të gjithë nëpunësve civilë që fitojnë më pak se 2.600 euro me 52 euro të tjera, ose rreth 50 për qind të asaj që kërkojnë mësuesit.
Mësuesit ankohen se, për shkak të zhvlerësimit të karrierës në të kaluarën, ata janë nëpunësit e lartë civilë me pagën më të ulët, që do të thotë se gjendja e tyre financiare është përkeqësuar pas një rritjeje të fundit të inflacionit, në nivelin më të lartë të 30 viteve.
Mësuesit me pagën më të ulët paguhen rreth 1,100 euro në muaj dhe ata në grupin e pagave më të larta zakonisht fitojnë më pak se 2,000 euro në muaj.
“Për vite të tëra, ata (politikanët) heshtën. Ne kemi nevojë për kushte më të mira për sa i përket pagave, është e papranueshme që të mos kemi përparim në karrierë,” tha Isabel Pessoa, 47 vjeçe, një mësuese biologjie.
Mësuesit dhe stafi tjetër arsimor në të gjithë Portugalinë kanë ndërmarrë aksione greve që nga fillimi i dhjetorit, duke mbyllur shumë shkolla dhe duke i lënë nxënësit pa mësim. Grevat janë organizuar zonë për zonë me ditë të njëpasnjëshme veprimi në secilin nga 18 distriktet e Portugalisë.
Qeveria e ka kritikuar Unionin e mësuesve për mënyrën se si i ka organizuar grevat, sepse, sipas saj, nuk ka një orar të paracaktuar për grevë dhe mësuesit kanë refuzuar dialogun, duke ndërprerë mësimin.
/Liberale.al/
