Kryesore

8 Dhjetori i ndarë i demokratëve

               Publikuar në : 09:31 - 09/12/21 ro ot

Ish-kryetari Berisha e pa Ditën e Rinisë, si rast për t’u bërë thirrje demokratëve për t’iu bashkuar Kuvendit të tij. Ai tha se ishte koha për rithemelim të PD-së. Kryetari Basha u kërkoi falje demokratëve, pasi 31 vite më vonë shqiptarët janë ende nën regjim. Për kryedemokratin PD vijon të mbetet e fortë dhe në këmbë, megjithëse demokratët janë më të ndarë se kurrë në dy kampe.

Suadela Balliu

Përkujtimi i vrasjes së Azem Hajdarit më 12 shtator, i gjeti Sali Berishën dhe Lulzim Bashën të ndarë, vetëm pak ditë pasi ky i fundit mori vendimin për ta përjashtuar ish-liderin nga  grupi parlamentar i PD-së. Të dy evokuan figurën e drejtuesit të Lëvizjes Studentore të Dhjetorit ’90 për të përcjellë mesazhe, secili sipas  anës së tij të medaljes.

Ashtu si edhe gjatë përkujtimeve për 23 vjetorin e ndarjes nga jeta të Hajdarit, Sali Berisha përkujtoi ditën e Rinisë në memorialin e politikanit, të cilin muaj më parë e cilësoi tribun.

I shoqërur nga demokratët, tashmë të pozicionuar në mbështetje të tij, ish-kryeministri kujtoi ditët e Lëvizjes së Dhjetorit, që sollën edhe fundin e regjimit diktatorial.

“Azem Hajdari, ndau historinë, ndau epokat e shkallmoi dyert e mbyllura të lirisë për Shqipërinë dhe shqiptarët. Sot në mblidhemi në këtë shesh ku edhe filloi revolucioni paqësor më i madh në historinë e kombit shqiptar”, do të shprehej Berisha, ndërsa shoqërohej edhe nga i biri i zotit Hajdari dhe e veja e tij. Ish-kryetar i  Partisë Demokratike dhe një prej themeluesve të saj, e cilësoi lëvizje, pjesë e së cilës u bë më vonë si revolucion paqësor.

Në këtë kontekst, ata që nisën këtë revolucion, Azem Hajdari që i priu me guxim të jashtëzakonshëm firmosën në historinë e kombit një nga faqet më të ndritura të lirisë së tij”, do të shprehej Berisha, duke e paralelizuar dhjetorin e tanishëm me atë të shkuarin.

“Betejat e dhjetorit ishin beteja të pabarabarta. Në një anë studentët të armatosur vetëm me guximin e tyre dhe në anën tjetër tanket, gazi lotsjellës dhe terrori i policisë sekretë shqiptare. Por asgjë nuk mund të mposhtë përpjekjet e rinisë për liri dhe dinjitet njerëzor. Ndaj këtu nisi beteja e cila do të shndërrohej me shpejtësi në uragan”, do të thoshte më tej ai.

Ashtu si edhe në kohë të tjera, të vështira politikisht për demokratët, Berisha iu rikthye figurës së Azem Hajdarit. Në shtator të këtij viti, ai u bëri thirrje demokratëve të ishin me kokën lart dhe me fjalët “Azem ti je i gjallë!”  Kremtimet e Ditës së Rinisë,  për Berishën ishin rast i mirë t’u bënte edhe njëherë thirrje demokratëve për Kuvendin e 11 Dhjetorit.

Ai pohoi  se në 11 dhjetor do të rithemelohet PD. Zotim që e bëri edhe në kohën kur ndërmori turin me “Foltore”-n.

Ai nuk i kurseu akuzat edhe ndaj kryeministrit  Rama, të cilin e cilësoi armikun më të egër të pluralizmit, ndërsa Bashën si tradhtarin më të madh.

Duke bërë një historik të shkurtër të Partisë Demokratike dhe arritjeve të vendit nën qeverisjen e tij, Berisha u ndal tek kalimi në opozitë më 2013, vit kur edhe dha dorëheqjen si kryetar.

“Në këto 8 vite ai në lidhje me krimin, me nostalgjinë e modelit të etërve të tij bëri në mënyrë kriminale arritjet e mëdha. Koha ndaloi dhe bëri prapakthehu. Në këto 8 vite, PD, demokratët derdhën lumenj djersë, sakrificat, por mjerisht ata kaluan nga një humbje në një humbje tjetër”.

Berisha iu referuar kryetarit të PD-së, si Lulzim Boshi  apo peng-kryetari. Edhe më herët, ai e ka akuzuar kryedemokratin se bashkëpunon me kryeministrin Rama e madje është i marrë peng nga ky i fundit. Berisha ka folur edhe për dosjen e ashtuquajtur “Toyota Yaris”, duke pretenduar se kryeministri Rama i kishte mbyllur hetimet ndaj kryetarit Basha në Shqipëri, porse ato ishin ende të hapura në Belgjikë. Pretendime të hedhura poshtë nga Basha.

‘Të gjitha këto erdhën se në 8 vite PD pushoi së qeni ajo që ishte. Drejtuesi i saj preu një nga një kolonat mbi të cilat ajo ishte ngritur, parimet dhe idealet mbi të cilat ajo qëndronte”.

Ish-kryeministri e cilësoi kreun e PD-së si tradhtarin më të madhe të pluralizmit dhe demokracisë.

“Mirëpo, llogaritë e Edi Ramës se ka marrë peng Lulzim Bashës do të mund të marrë peng idealet e pavdekshme të dhjetorit, të studentëve liberatorë, të PD, të dhjetëra qindra mijërave, anëtarëve të saj, të cilët shkrin të gjitha forcat dhe energjitë e tyre për një Shqipëri tjetër, kanë marrë fund”, shtoi Berisha. Ai e cilësoi këtë dhjetor,  si një i ri, i idealeve të larta.

“Të rithemelojmë partinë e dhjetorit të 90, partinë e studentëve dhe të të rinjve, të shqiptarëve, të votës së lirë”, bëri thirrje ai.

Ai lajmëroi se Kuvendi i 11 Dhjetorit-  cilësuar si tubim i paligjshëm nga  kryetari Basha-, do të mbahet në ambientet e stadiumit “Air Albania”, ndërsa u bëri thirrje  të bashkoheshin në të  edhe demorkatët që nuk firmosën për mbajtjen e tij.

“11 dhjetori po vjen, është ditë e madhe e atyre që themeluan PD-në, e atyre që arritën që të përmbysin diktaturën komuniste, që ndërtuan Shqipërinë demokratike. E atyre që në një moment kritik për pluralizmin politik, u ngritën si Feniksi dhe do të ndërtojnë në 11 dhjetor monumentin madhështor të pluralizmit politik”, ka përfunduar ai.

Para demokratëve, në këtë 8 Dhjetor, u zotua edhe kryetari Lulzim Basha. Ai e shfrytëzoi këtë ditë edh për një “mea culpa” në emër të Partisë Demokratike.

“PD në këmbë, PD është e fortë, PD ka ditur dhe do të dijë të qëndrojë në këmbë, e fortë, e bashkuar, sepse ne kemi një mision, lirinë, demokracinë, Shqipërinë si gjithë Europa. E kemi marrë nga dhjetoristët dhe nuk e dorëzojmë, derisa ta bëjmë realitet”, do të shprehej kryedemokrati.

Basha theksoi se në krah të Partisë Demokratike, në ato fillime të themelimit të saj dhe pluralizmit ishin Shtetet e Bashkuara të Amerikës, një aleancë që ai u kujdes ta përtërinte, ndërsa kërkonte transparencë për shpalljen “non grata” të ish-kryeministrit dhe ish-presidentit Berisha. Edhe më vonë, Basha nuk e mohoi se ishte një vendim i kërkuar nga ShBA për ta përjashtuar Berishën nga grupi parlamentar i PD-së. Kryetari i Selisë Blu e ka theksuar shpesh para demokratëve se pa ndihmën e ShBA-së, Partia Demokratike nuk do të ekzistonte dhe ka premtuar se nuk do të lejojë bunkerizimin e saj për interesat personale të Berishës. Ai madje ka deklaruar se nuk do të lejojë mbajtjen e asnjë kuvendi anti-amerikan. Deklarata që u pasuan nga vendimi për të mbajtur një Kuvend Kombëtar , vetëm një javë pas atij të programuar nga Berisha.  Ndërsa zoti Berisha është u shpall “non grata” për përfshirje në korrupsion domethënës dhe minim të demokracisë gjatë viteve që shërbeu si kryeministër, Basha pranoi se djegia e mandateve dhe bojkoti i zgjedhjeve lokale më 2019  ishin ide e kahershme e ish-kryeministrit Berisha.

“Por, ndërkohë që 8 dhjetori na thërret të përkulemi para veprës së dhjetoristëve, rrallëherë kemi kërkuar falje. Sot është dhe dita për të kërkuar falje. Është dita për të kërkuar falje, sepse 31 vjet më vonë ndodhemi përsëri në kushtet e një regjimi që shumë ka të përbashkëta me diktaturën dhe produktet e diktaturës”, foli Basha para demokratëve.   Ai dhe PD kanë ndërmarrë nisma për ndryshime kushtetuese si ai i Vetingut të Politikanëve, për të pastruar politikën nga fenomeni të cilin kryedemokrati e cilëson si “llumi i tranzicionit”.  Në këtë etiketim, ai nuk i ka kursyer as demokratët, ish-zyrtarë të qeverisjes së shkuar të demokratëve.

“31 vite më vonë nuk ka më kohë për mua, për brezin tim, sepse do të ishte një mëkat i pafalshëm ndaj të rinjve të sotëm, që të mbyllim sytë e të mos pranojmë atë pjesë të fajit që është e jona, faktin që shkulëm komunizmin, por jo mentalitetin komunist. Të kërkojmë falje dhe e kërkoj sot faljen si kryetar i PD, në emër të PD, në emër të demokratëve, për të gjitha ato përgjegjësitë tona, gabimet tona, pse jo dhe fajet tona, që i kanë mundësuar këtij regjimi ta kthejë Shqipërinë në dimensionin e vuajtjes,  aty ku ishte 31 vite më parë”, tha Basha.

Edhe kryedemokrati nuk harroi të jehonte figurën dhe emrin e Azem Hajdarit, duke përdorur të njëjtat terma si Berisha, duke e quajtur “tribun”.

“Dua t’ju shpreh edhe si 16 -vjeçari i Dhjetorit ‘90 edhe si qytetar prind, demokrat, kryetar i PD, mirënjohjen më të thellë, dhjetoristëve të ’90. Disa janë, disa janë ndarë nga ne duke nisur me tribunin, dhjetoristin e lëvizjes studentore Azem Hajdarin…”, tha Basha.

Por megjithë nderimin që u bëri dhjetoristëvve, kryetari Basha nuk harroi të thumbonte ish-kryeministrin, me të cilin prej shtatorit është në një betejë frontale.

“Duhet ta themi se rruga ishte e vështirë, prej terrorit që mbizotëronte. Kulti të individit, që për fat të keq vazhdon siç vazhdojnë shumë aspekte të mentalitetit komunist, të dominojnë jetën publike, në PS, por edhe brenda familjes tonë politike dhe ky nuk është momenti për të thirrur emrin e kryetarit sepse ajo që kulti i individit bëri është që shkatërroi individualitetin e çdo shqiptar”i, tha Basha. Shpesh në deklaratat dhe intervistat e tij, ai e cilëson betejën e Berishës për interesa personale. Edhe ambasadorja amerikane, Yuri Kim  i drejtua demokratëve muaj më parë të “mos hanin bar për hir të interesave të një individi”.

“Duhet të jemi krenar dhe ballëlart ndaj lëvizjes së lirë. Ne e dimë se Europë mbi të gjitha do të thotë individualitet secili është i shenjtë në individualitetin e vet. Askush s’mund t’i mbivendoset askujt tjetër, të gjithë jemi të barabartë para ligjit para Zotit. Ajo që ndodhi nuk ishte e lehtë ndaj edhe guximi që mposhti frikën ishte vetëm hapi i parë”, tha Basha.

Përtej 8 Dhjetorit, ditë me rëndësi të veçantë për demokratët është edhe 11 dhjetori, datë që përkon me themelimin e Partisë Demokratike, si partia që shënjoi ardhjen e pluralizmit politik në Shqipëri. Jo më kot, Berisha e zgjodhi këtë datë simbolike, për të theksuar thirrjet e tij për rithemelim të PD-së, në ato që ai i cilëson vlera konservatore.

Basha është shprehur se nuk do ta lejoj Berishën ta shndërrojë këtë ditë, që përkon me kremtimet e 31 vjetorit të themelimit të PD-së, në ditën e bunkerizimit të partisë. Edhe Basha nga ana e tij u ka bërë thirrje demokratëve- edhe atyre që kanë votuar pro mbajtjes së Kuvendit më 11 dhjetor- t’i bashkohen atij të 18 dhjetorit, ndërsa e sheh si Kuvendi i vetëm legjitim që do të bashkojë demokratët, sot më të përçarë se kurrë në këto tri dekada. /Gazeta Liberale


KOMENTO (0)

Shkruaj nje koment

Your email address will not be published. Required fields are marked *

* *

Back