Aktualitet

Kultura si një mundësi për zgjerimin e bashkëpunimit në rajonin e Ballkanit, qasje e re ndërdisiplinore

Shkruar nga Liberale
Kultura si një mundësi për zgjerimin e bashkëpunimit në

Në konferencën shkencore “Pikëtakime kulturore në rajonin e Ballkanit”, zhvilluar sot në Shkodër, diskutuan studiues nga Universiteti i Shkodrës, fakulteti i filologjisë i Universitetit të Beogradit, si dhe fakulteti i filologjisë i Universitetit të Tetovës.

Duke theksuar rëndësinë e shkëmbimeve kulturore, profesor Artan Haxhi, nga Universiteti i Shkodrës, theksoi nevojën e bashkëpunimit, pasi ballkanologjia ka nevojë për një qasje ndërdisiplinore për të kapur problematikat e këtij rajoni.

“Ballkani është një rajon i pasur në histori dhe me diversitet kulturor, por është edhe rajoni i sfidave të mëdha. Në këtë kontekst, pikëtakimet kulturore shërbejnë si mjet i fuqishëm për të thelluar dialogun dhe bashkëpunimin midis kulturave të ndryshme”, tha ai.

Profesor Artan Haxhi, dekan i fakultetit të shkencave shoqërore në Universitetin e Shkodrës, thotë se kultura është një mjet për të tejkaluar dallimet. Ndaj, bashkëpunimi është mundësi për tu përballur edhe me sfidat e sotme të rajonit të Ballkanit.

Në konferencë mori pjesë edhe drejtuesja e departamentit të gjuhës shqipe në Universitetin e Beogradit, profesoreshë Naile Mala Imami me studimin “Kontaktet e para kulturore me theks të veçantë bashkëpunimi midis dy luftërave botërore”.

Profesoreshë Imami theksoi se, marrëdhëniet kulturore mes shqiptarëve dhe serbëve kanë patur vazhdimisht luhatjet e tyre për shkak të situatave gjeopolitike.

“Natyrisht që katedra e ndan fatin e marrëdhënieve shqiptaro-serbe. Bashkëpunimet ndërkulturore ndërmjet Shqipërisë dhe Serbisë kanë pasur faza të ndryshme. Shpeshherë bashkëpunimi ka qenë i gjithanshëm, por ka edhe momente që nuk kemi pasur kurrfarë bashkëpunimi”, thotë ajo.

Profesoreshë Imami thotë se departamenti i gjuhës shqipe në Universitetin e Beogradit ka një numër bashkëpunimesh me universitetet shqiptare.

“Që nga viti 2007 kemi marrëveshje me kater universitete të Shqipërisë. Me Universitetin e Vlorës, me atë të Shkodrës, me Tetovën dhe shpresoj shumë që në të ardhmen të kemi edhe me Prishtinën. Kështu që presim bashkëpunime të dyanshme edhe më të mira”, thotë profesoreshë Imami.

Për profesor Berton Sulejmanin, dekan i fakultetit filologjik në Universitetin e Tetovës në Maqedoninë e Veriut, megjithë përparimet, ende nuk është i njëjtë statusi i shqipes me maqedonishten.

“Gjuha shqipe ka një ngritje dhe ka një përdorim më të madh, po jo plotësisht e barabartë me gjuhën maqedonase. Unë përdori një shprehje se, gjuha shqipe si gjuhë zyrtare është në dy shtete në Ballkan; në Republikën e Shqipërisë dhe në Republikën e Kosovës. Megjithatë, në Maqedoninë e Veriut gjuha shqipe, do të kisha thanë, është në përdorim zyrtar, por jo gjuhë zyrtare”, thotë ai.

Profesor Sulejmani thotë se duhen lidhur marrëveshje të reja ndërmjet universiteteve dhe se, krahas bashkëpunimeve dhe këmbimeve ndërmjet stafeve akademike, është i nevojshëm edhe bashkëpunimi mes studentëve.

Duke theksuar nevojën e shkëmbimit të informacionit dhe bashkëpunimit, bazuar në studimin e historisë, gjuhës, arsimit, kulturës, por edhe zhvillimeve aktuale në rajonin e Ballkanit, studiuesit sollën aspektet nga kontaktet gjuhësore shqiptaro-malazeze, pasqyrimi i konflikteve ndëretnike në mediat serbe dhe shqiptare, apo shndërrimet në rrugën skadarlie të Beogradit.

Liberale Newsroom

Poll
SHQIPENGLISH