Aktualitet

34 vjet nga varja në litar e poetit Havzi Nela, Basha: Sfidoi diktaturën gjakatare, lavdi përjetë!

Shkruar nga Liberale
34 vjet nga varja në litar e poetit Havzi Nela, Basha: Sfidoi

Dega në Kukës e Partisë Demokratike përkujtoi sot, në 34-vjetorin e varjes së tij nga regjimi komunist poetin e fjalës së lirë, Havzi Nela. Lidhur me këtë ka reaguar edhe ish-kryetari i Partisë Demokratike, Lulzim Basha.

Në një postim në rrjetet sociale, Basha shkruan se, 34 vite më parë, regjimi komunist ndërmori një nga aktet më barbare të historisë së tij famëkeqe, duke dënuar me vdekje patriotin, poetin, mësuesin dhe intelektualin, Havzi Nela, që me vargjet e tij kurajoze sfidoi diktaturën gjakatare dhe krimet kundër shqiptarëve.

“Pas 21 vitesh burg, tortura dhe internime, diktatura humbi çdo shpresë që ta mposhte shpirtin e tij të lirë ndaj vendosi ta vrasë në mes të Kukësit për ta bërë shembull. Por vetëm e përjetësoi Havzi Nelën dhe veprën e tij, e cila u ngrit kundër përçudnimit të individit, kundër zvetënimit të vlerave individuale, kundër shkatërrimit të çfarëdolloj tradite të mirë shqiptare, që na mbajti për dekada larg Perëndimit", shkruan Basha.

Ndërsa më tej në mesazhin e tij, demokrati shprehet se, “në këtë ditë kujtese, ne nderojmë shpirtin e tij të pamposhtur, që qëndroi kryelartë për lirinë dhe demokracinë, martir i të cilës ai do të mbetet në përjetësi.”

“Duke mos harruar të shkuarën, duke kujtuar dhe nderuar qëndrestarët dhe ata që sfiduan diktaturën, ne do të mund të ndërtojmë të ardhmen, përmes refuzimit të së keqes dhe banalitetit të saj dhe bazuar mbi vlerat më të mira të shqiptarëve dhe qëndresës për liri, për demokraci dhe një Shqipëri të mundësive dhe dinjitetit për të gjithë! Lavdi përjetë Havzi Nelës!”, përfundon Basha. /Liberale.al

 

Liberale Newsroom

Poll
SHQIPENGLISH