Aranit Muraçi
Shqipëria e blen shtrenjtë energjinë në tregjet ndërkombëtare dhe e shet lirë. Dhe kjo është një tjetër arsye e dështimit të sistemit tonë energjetik. Për muaj të tërë KESH mori financime nga buxheti i shtetit për të blerë energji elektrike, kjo pasi burimet ujore gjatë verës shkuan në pikën kritike, për shkak të thatësirës.
Rreth 430 milionë euro janë shpenzuar deri tani për importin e energjisë elektrike, ose është shpenzuar një shumë e përafërt me shumën që ka tejkaluar buxheti i shtetit në planin e mbledhjes së të ardhurave nga rritja e çmimeve gjatë muajve të këtij viti. E thënë ndryshe, gjatë këtij viti qytetarët shqiptarë produktet e hidrokarbureve dhe të ushqimeve i kanë blerë më një çmim më të shtrenjtë (nga TVSH-ja apo taksat e tjera) dhe me të ardhurat e grumbulluara qeveria ka importuar energji elektrike, me një çmim të shtrenjtë, dhe kjo është arsyeja pse nuk është rritur çmimi i energjisë për qytetarët. Megjithatë, qytetarët shqiptarë e kanë blerë energjinë këtë vit, duke e paguar atë po aq shtrenjtë si kudo në Europë, ndoshta edhe më shtrenjtë por në një formë tjetër (përmes taksave që kanë paguar për produktet e tjera të importit).
Shirat e shumtë të dy ditëve të fundit kanë mbushur hidrocentralet prej nga ku sigurohen mbi 60 për qind e nevojave. Jo vetëm që janë plotësuar nevojat në vend dhe është ndërprerë blerja e energjisë, por KESH ka hapur tenderin në dy ditët e fundit për të shitur energji në tregjet e huaja.
E nëse shqiptarët e kanë blerë energjinë me një çmim mesatar 225 euro/MWh vetëm një javë më parë, e kanë shitur atë sot plot tre herë më pak në tregjet ndërkombëtare.
Sigurimi i furnizimit me energji në vend ka detyruar Korporatën Elektro-energjetike Shqiptare (KESH) që të zhvillojë për nëntorin katër procedura blerjeje në treg. E fundit është realizuar për një periudhë një javore, 14-20 nëntor, dhe në total blerjet kanë rezultuar prej 31 milionë eurosh. Duke qenë se KESH nuk mund të parashikojë dot shirat që do të vijnë, i takon një tjetër institucioni që t’i vijë në ndihmë, Shërbimit Meteorologjik Shqiptar. Nuk dihet se në çfarë saktësie i bën matjet një shërbim i tillë dhe sa në ndihmë u vjen institucioneve të tjera.
Por ajo që vlen të theksohet se, është ose defekt i Meteorologjisë që nuk ka parashikuar si duhet nivelin e lartë të reshjeve gjatë ditëve të fundit, ose paaftësi e KESH për të menaxhuar situatën. Në të dyja rastet përgjegjësia mbetet përgjegjësi që rëndon direkt mbi konsumatorin. Nëse nuk e shet energjinë po aq shtrenjtë sa e blen, të paktën ajo nuk duhet të blihen kur nuk duhet.
KESH bleu për një javë energji elektrike me një çmim marramendës, siç mësohet, duke mos pasur informacion të saktë mbi sasinë e reshjeve që do të binin në fundjavë. KESH bleu një sasi prej 42.504 Mgh me një çmim prej 228 euro/MWh (nga 228.69 që ishte çmimi më i lartë dhe 227 që ishte çmimi më i ulët i kontraktuar).
KESH ka dalë dhe ka shitur energji në dy ditët e fundit, në dy lotet e para rreth 2640 MWh për rreth 100 euro dhe sasinë më të madhe prej 5.400 Mwh KESH e ka shitur në lotin e tretë për vetëm 73.19 euro.
Humbjet janë humbje, përgjegjësia është përgjegjësi, në fund të fundit paratë i paguajnë shqiptarët nga xhepi i tyre. /Liberale.al/
