Aktualitet

Mungesa e reshjeve, Belinda Balluku paralajmëron rritjen e çmimit të energjisë

Shkruar nga Liberale

Mungesa e reshjeve duket se e ka vënë qeverinë në një pozicion të vështirë. Të rrisë apo jo çmimin e energjisë, kjo është çështja. Nëse çmimi nuk rritet, ai do të blihet me një çmim të lartë në tregjet ndërkombëtare dhe do të rëndojë sërish mbi ekonominë dhe indirekt mbi konsumatorin.

Ministrja e Infrastrukturës dhe Energjetikës, Belinda Balluku, paralajmëron një mundësi të aplikimit të fashës mbi 800kwh. Për shkak të kushteve jo të favorshme atmosferike dhe mungesës së reshjeve, Balluku thekson se do të kryhet një analizë e detajuar për rritjen e çmimit të energjisë për familjet që e kalojnë konsumin 800 kwh në muaj.

“Faturimi i energjisë nis pas javës së 1 të muajit. Me një situatë jo të mirë hidrike, kur niveli i Fierzës është më pak se 268m, por me pritshmëri për prurje më të mira në vazhdim & bazuar në uljen 6.2% të konsumit, do të analizojmë çdo detaj, para vendimit për fashën mbi 800kwh”, shkruan Balluku.

Rama mohoi rritjen pak ditë më parë, kurse kreu i grupit Parlamentar Taulant Balla tha se fasha 800 kwh për çmimin e energjisë për konsumatorët familjarë, më shumë mundësi nuk do të aplikohet as në muajin nëntor. Ai shtoi se qeveria ka vendosur që ta shtyjë fashën, si edhe ka njoftuar për këtë vendim edhe Entin Rregullator.

Ndonëse moti nuk ka qenë në favor të situatës hidrike në vendin tonë, fasha u shty pasi ka pasur një mirë-menaxhim të situatës energjetike, si edhe një ndërgjegjësim të qytetarëve të cilët kanë kursyer energjinë. Por vendimi mbetet i rishikueshëm dhe nëse do të ketë një përkeqësim të situatës energjetike në vend, mund edhe të aplikohet fasha.

Liberale Newsroom

Poll
SHQIPENGLISH